بص لنفسك فى المرايه

'بسم الله الرحمن الرحيم
فى البدايه احب اشكر ناس كتير اوى اولهم اللى شرفونا بدخولهم المدونة واخوانى اللى شجعونى انى اعمل مدونة ويارب تعجبكم وتنول رضاكم
اخيراعملت المدونة واخترت لها اسم حلم كبير مش عشان قلة احلامنا (لاسمح الله)لا عشان قله تحقيقها
يارب نقدر مع بعض نحقق احلامنا مهما كانت كبيرة
ندخل بقى فى الموضوع
ياتري كل واحد فينا الصبح قبل ما ينزل من بيته وهو بيبص فى المراية ياترى بيبص على ايه؟؟؟
اكيد على شعره او عينه وسحرها او انفه وجمالها وياترى التسريحه كويسة ولو بنت ياترى لفة الطرحة مضبوطة المهم انها حاجات كتير كلها شكليات
طيب فى حد مره وهو بيبص فى المراية بص للقدرات اللى ربنا سبحانه وتعالى وضعها فى هذا الجسم والشكل
ما تيجوا كده نشوف بعض هذه القدرات اللى انا واثق اننا لو عرفناها وركزنا عليها هنقدر نحقق احلامنا اللى دايما نحلمها ومبنقدرش نحققها ومانطلش من احلامنا الا الياس فوق الياس
1-وانت بتبص فى المراية الصبح بص على عقلك
تعرف ان ربنا سبحانه وتعالى خلق العقل لاى انسان فيه من 50 الى 150 مليار خلية عقلية يعنى لو هتقعد كده تكتبهم ارقام عايز 5 سنين ...وكل خليه من الخلايا دى تستوعب معلومة تخيل بقى انت ممكن تستوعب اد ايه
طيب انت عارف السعه التخزينيه لاقل عقل فينا اكبر من السعة التخزينيه لجميع كمبيوترات العالم كلهم
شوف بقى انت عقلك يساوى كام
ياريت تقوم تبص فى المراية بشكل جديد
2-وانت بتبص فى المراية الصبح كده بص على عينك
تعرف ان العين الواحدة تقدر تميز اكثر من مليون لون فى اللحظة الواحدة
تعرف ان عينك الواحده افضل من 150 كامرا موجودة فى اعظم صالات التصوير فى هليوود
شوف بقى العين الواحدة تساوى كام
3-وانت بتبص فى المراية بص على عضلات جسمك كلهم
تعرف ان عضلات جسمك لو اتحطوا جنب بعضهم واتوحد الاتجاه بتاع العضلات تقدر تشد 25 طن
شوف اد ايه انت قوي لا مش قوي دا انت خارق علشان انت صنع الله
ياريت تقوم تبص فى المراية بشكل مختلف
4-وانت بتبص فى المراية حاول تفتكر الطاقة والاشارات والذبذبات اللى فى مخك اللى لو اتوصلت بسلك تولد طاقه كهربية تكفى لانارة مدينه لمده اسبوع
عارف الطاقة دى لو بتتشرى مش اقل من 80 مليون دولار شوف اد ايه انت غني
ياريت تبص بقى فى المراية بشكل مختلف
5- وانت بتبص فى المراية قول (هذا خلق الله) واستشعر كده خلق الله عز وجل كيف يكون.... واستشعر قول الله عز وجل (ولقد خلقنا الانسان فى احسن تقويم) يعنى بعد الخلق وهبنا الله سبحانه وتعالى احسن تقويم.... مش كده وبس استشعر كده قول الله عز وجل (ولقد كرمنا بنى ادم )يبقى خلق الله ثم احسن تقويم ثم تكريم لبنى ادم من دون المخلوقات
تخيل !!! انت اعظم مخلوق على وجه الارض
الخلاصة
خلقنا الله عز وجل من اجل اهداف (احلام) عظيمة لذا فكلنا متساوين فى المواهب والقدرات ولكن كل منا يحيطه ظروف ومؤثرات خارجية مختلفة وسواء كانت هذة المؤثرات سيئة او جيدة فانت الوحيد القادر على ان تستغلها لصالحك او فى غير صالحك مهما تباينت الظروف فى الاختلاف
وتذكر جيدا ( ان الناجحين فى هذه الدنيا اناس بحثوا عن الظروف التى يريدونها فاذا لم يجدوها وضعوها بانفسهم) لبرنارد شو