خواطري فى معسكر بور سعيد 2

اليوم الثاني
طابور الجرى: افضل فقرات المعسكر... لفة جرى حول المعهد ... *اتفقت مع احمد مختار على عدم الجرى مره اخرى وفعلا مجرناش وكانت مشكله كبيرة
(شافنا مشرف من المعهد صغير السن وجالنا وبيزعق لنا سكتنا خالص لاننا غلطانين لحد ماقال دى صياعة.. قلت له لا متغلطش .. قال لى انت لازم تسمع الكلام.. قلت له اللى بيخلينى اسمع الكلام الاحترام المتبادل لما تغلط مافيش احترام .. فضل يزعق فجأه بادرته بسؤال .انت مواليد كام يا كابتن مصطفي ؟؟... غضب اكتر وكان واضح انه تقريبا اكبر منى بسنه او اتنين لانه خريج تربيه رياضية المهم لما عرف انى فى 6 طب بقينا حبايب ولمينا الدور )
الافطار:فخم كالغذاء والعشاء ...تذكرت المقولة (من صحت بدايته صحت نهايته)
وقلت يبقى اكيد من صح افطاره صح غذائه صح عشائه (وياعجبي)
المحاضرات حاضرنا نائب رئيس الجامعة ا د / عاطف علم الدين عن تطوير العملية التعليمية
*سقفنا 36 مرة فى محاضرة لم تتجاوز الساعتين
ما اعجبنى ...الاسئلة كانت غير مشروطة وغير مقيدة على عكس ماتوقعت فى معسكر يضم نخب الحزب الوطني
الحلقات النقاشية عن المواطنة والانتماء والفرق بينهم وبما ان عضو الحزب الوطنى يعتبر البلد زى عزبة باباه فبالتالي هو اكثر الناس مواطنة والمعني فى بطن الشاعر
*المفاجأة جولة حره لمشاهدة مباراة مصر ورواندا حيث ردد مسؤول المعهد فى الطابور يلا عملنالكم الجولة الحرة عشان تتفرجوا على الماتش .........ثم اردف قائلا ( كله عشان مصر ) اه والله مابكدب قال كده
اليوم الثالث يوم الخدمة العامة
ذهبوا بفوج جامعه طنطا الى حديقة وطلبوا منا نظافتها
اخذنا (المقشات والفرش وباقى الادوات ) من عمال النظافة وبدأنافى العمل . وللعلم كانت افضل فقره استمتعنا بها وعملنا بجد واخلاص فيها

بصيت لعامل من العمال وقلت له ماهو انتم لو بتشتغلوا كل يوم بضمير مكناش تعبنا كده فى الحديقة
ضحك وقال لى انت فى سنه كام يابنى ؟؟
قلت له 6 طب
فجاة الابتسامة راحت وقال لى يادكتور متبهدلش نفسك اقعد.. اجيب لك شاى ؟؟
قلت له دا انا اكتشفت مواهب جديده فى نفسى ياعم الحاج سبنى اشوف شغلى
حط انت تعليق على الصورة
الانشطة الثقافية والرياضية
اختارنى المشرف الطالب المثالى وانا فى الحقيقة اقل الفوج فى كل شئ واللى عايز ينضم لاى نشاط ينضم براحته وبدون اى اختبارات عشان كده مفلحناش فى حاجة ( عرفت ساعتها مصر مش بتحصد ولا ميدالية فى العاب البحر المتوسط ليه )
اليوم الرابع
بقالنا 3 ايام ولسه مشترناش حاجه ولا اتفسحنا
لبست انا واحمد مختار ونزلنا ودبرنا خطة للهروب رغم وجود 3 حراس على البوابة و2 مشرفين الجامعه فى فناء المعهد وقف 5 من جامعه المنيا على السور بجوار البوابه يكتبون ايه قرأنية على جدار السور
زعقت بصوت عالى لهم وقلت لهم بيقول لكم المشرف لازم نشكل الايه القرانية ونعمل برواز على الاية ففهم الحراس اننا معاهم وسابونا نقف معاهم
قال احدهم انتو مين قلت له احنا عايزين نخرج فهنقف شوية كده معاكم عما يطمنوا لنا خالص وبعدين نطلع
قال لى بصوت عالى محمد هات لى علبه بوية من بره بسرعه عشان نكمل الكتابه قلت له حاضر ولقيت احمد مختار بيقول لى استنى جاى معاك وخرجنا من البوابه امام الحراس كافضل مايكون
لم تفلح هذه الخطة مع بسيونى وعبد ربه وحسب الله فلجأوا الى خطة جديدة
ذهبوا للمطبخ وشالوا براميل القمامة وخرجوا من البوابة بحجه رمى القمامة بعيدا عن المعهد وبالفعل خرجوا
عرفنا (بضم العين وكسر الراء )بعد ذلك على مستوي الجامعه ( المطاريد بتوع البوية ) و ( المطاريد بتوع الزبالة )
بتوع الزبالة رجعوا الساعه 12 واحنا رجعنا الساعه 1 ونص
فوجئنا باجراءات ضدنا حيث المنع من المكافئة وسحب التريننج (هدية من المعهد) ومنع من الخروج لرحله الشاطئ تانى يوم واصبحنا اشهر 5 على مستوي الجامعات
التميز شئ جمييل جدا حتى لو كان فى عمل خاطئ تخيل لو تميزنا فى عمل نافع بقى
كنت حاسس باستمتاع وانا متميز حتى لو كان تميز فى الهروب ومخالفة النظام ساعتها فهمت ان حتى المجرمين (فتح الراء وتشديدها) قانونيا فى لذة كبيرة لانهم متميزين.( مش عارف انا قادر اوصل الخاطرة ولا لا )
منعنا فعلا من المكافئة والتريننج ولكن ذهبنا الى رحله الشاطئ بعد اعتراض بعض الزملاء على منعنا
الحقيقة كله اعترض على منعنا وطالبوا المشرفين اننا نروح معاهم الا بنت واحده و3 صبيان

السؤال بقى لو انت معانا كنت هتوافق منعنا من الشاطئ ولا هتطلب اننا نيجى معاك الشاطئ؟

انا لله وانا اليه راجعون

انا لله وانا اليه راجعون .. اللهم تقبلها فى الشهداء واسكنها الفردوس الاعلي وارزق اهلها لصبر والسلوان .. انا لله وانا اليه راجعون

مشروع دفعتنا .. كصدقة جارية على روح الفقيدة .. عند محمود أبو العزم .. هنا

نسألكم خالص الدعاء

خواطري فى معسكر بور سعيد

ذهبنا الى بور سعيد من 3/7 وحتى 7/7 حيبث قضينا اربعة ليال وخمسه ايام ضمن فوج جامعة طنطا
كانت خواطري كالتالي
*ركبنا اتوبيس فخم جدا اول لبسة قصدى اول استخدام ربما لم نره من قبل ولن نراه مرة اخري لان وظيفة الاتوبيسات دى تقريبا المعسكرات وفقط
*وصلنا الساعه 1.30 تقريبا الى بور فؤاد حيث ارض المعهد ( معهد اعداد القادة ) محدش يسالنى قادة ايه وعن ايه هو كده وخلاص ولحد مارجعنا برده محدش فاهم قاده ليه وعن ايه وهنعمل ايه
بين بور سعيد وبو فؤاداعداء النظام ومخططى ومنفذى عمليات الهروب . للاسف الصورة واكله وشى
*شعور مذهل واحنا بنعدى بالاتوبيس على المعدية فى وسط القناة وانت بين قارتين
نزلت على المعدية وانا فى قمة السعادة
*تذكرت خلالها قائمة ربما من عشرة اشخاص تصدرت القائمة أمي الغالية ثم ابي ثم اخى حسن ثم بعض اخواني واصدقائي
وددت لو هاتفتهم جميعا وانا اخطو بين قارتين لكن لم يسعنى الوقت الا ان اهاتف امي الغالية
نظر الي احد الاشخاص ( مش من فوج طنطا ) باستغراب شديد لكلامى لوالدتى ومدى حرصى على الحديث اليها وانا بين قارتين
قلت له انت خاطب ؟؟؟
قال لى لا
قلت له ولا حتى مأنتم ؟؟؟
فضحك ...قلت له .لو ناوى تخطبها كلمها وعرفها انك تذكرتها فى مكان جديد بالنسبه لك (واى مكان انه مكان على سطح الماء يفصل بين قارتين)
بص لى باستغراااااااااب ولسان حاله يقول ياعم هو لسه فى كده فى الدنيا ؟؟ ياعم الدنيا مبترحمش
للاسف مكلمش حد ساعتها فهمت انه مانتم للتسليه فقط مش للحب والزواج بعد ذلك
*فى المعهد حقيقة كان المسئولين على درجه عاليه من احترامنا وحسن ضيافتنا وتيسير كل امور السكن والاقامة
المعهد من خلفنا والمدرج من امامنا (( لا مفر ولا مناااااص ))
*الاكل يوم نص فرخه ويوم قطعتين لحم بالاضافة للارز والخضار ومن ساعتها عرفت القاده بتوعنا بيطلعوا نايمين وكسلانين وطخان ليه؟
*اثناء طابور المساء بينزلوا العلم وقتها لازم كله يقف انتباه ومحدش يتكلم ولا كلمة وده كان اول انتباه ليا لرمز بلدى من ايام ماكنت فى 3 ثانوي ياريتهم يعملوا لنا علم فى الجامعة عشان نتذكر انتمائنا لوطنا كل يوم
*الطابور اعاد الى ذاكرتي (النظام) ووقفة الانتباه للعلم اعاد الى ذاكرتى (الانتماء)
طابور المساء الساعه 7 وعرفنا خلاله ان ده معسكر اعداد قاده يعنى مفيش خروجات مافيش فسح مافيش خروج من اسوار المعهد
ولسان حالنا احنا عمرنا مالتزمنا كده .. دا احنا بنبوز نظام اى رحلة بنطلعها .. على اخر الزمن نلتزم
ماخطر فى بالى وقتها خطر فى بال احمد سعيد واحمد مختار واحمد عبد ربه حيث تذكرنا مسلسل بريزن بريك ( الهروب الكبير )وبالفعل اعددنا كم فكرة للهروب من اسوار وبوابات المعهد
متقلقوش الخطط نجحت والحمد لله وهقول بعض الخطط المرة الجاية والحمد لله قدرنا نتسلل ونشتري ونتفسح بس للاسف قلبت بغم اخر يوم ودا دليل للهروب .. متصورين على شط القناة واخر حلاوة

*مشرف الفوج فهمنا ان اى تحرك لفوج طنطا بيكون رقم (6) حيث ترتيبها فى النشأة على مستوى جامعات مصر
الازهر.. القاهرة.. الاسكندرية ..عين شمس ..اسيوط.. طنطا .. وقال لنا هتلاقونا رقم 6 فى اى ترتيب
بادرته قائلا
يادكتور امال الزقازيق اتغدوا قبلنا ليه ؟؟؟
ضحك الجميع الا هو ربما من الصدمة
انتهى اليوم بالاستلقاء على السرير مبكرا لوجود طابور جرى فى الساعة السادسة اليوم الثاني

يتبع غدا .... تابعونا

صبر ساعة

ادم رجل اعمال مرموق يمتلك اكبر شركات الغزل والنسيج فى وطنه يعيش حياة هادئة مع زوجته

تمر الايام ( وكم هي متداولة الايام ) يخسر ادم الكثير والكثير حتى قارب على الافلاس

ذهب الى زوجته يائسا يشكو اليها افلاسه وامكانيه حبسه لو لم يتم دفع الديون فى خلال عام

خرج ادم من بيته قاصدا الساحل ليجلس بمفرده امام البحر يشكوه همومه

واذا برجل يلبس ثياب بيضاء ولحيه كثة بيضاء يجلس بجانبه ويساله ماذا الم بك ؟؟

استطرد ادم فى حديثه وكيف دارت به الدنيا من غنى وثراء الى اعتاب السجن مالم يسدد ديونه

فى بساطه شديدة ساله الغريب كم تحتاج من المال ؟؟

نظر اليه ادم ولماذا ؟؟ هل ستقرضنى ؟؟

فقال الغريب الا تعرفنى انا جيمس لون من اغنى اغنياء امريكا سأقرضك ما تريد على ان ترد لى المبلغ بعد عام فى نفس هذا المكان

فرح ادم لذلك واخذ منه الشيك بالمبلغ الذى يريده

طار فرحا الى بيته لكى يبلغ زوجته وماذا حدث معه

قالت الزوجه امامنا خيارين لا ثالث لهما

الاول ان تصرف الشيك وتسدد الديون على امل ان نعمل بجد لتسديد الشيك لهذا الرجل

الثاني ان ننحى الشيك جانبا ونعمل بجد ايضا ونقتنص انصاف الفرص ونطلب من الشركات ان يمهلونا فى التسديد ونقسط المبالغ لهم واذا لم نتمكن فمعنا الشيك

اختار الرجل الخيار الثاني ( خيار العزيمة والهمة العاليه والتوكل على الله ) عمل بجد ربما لم ينم

طلب من الشركات ان تمهله الوقت وان تقسط له المبلغ حاول بكل صغيرة وكبيره حتى لا يلجأ الى شيك الرجل

وبعد عام كان قد تمكن من تسديد كل ديونه ومازال الشيك بجانبه

نظر اليه وقال ارادتى افضل منك ولو كنت ذهبا خالصا

امسك بالشيك لكى يعيده الى صاحبه وذهب الى نفس المكان فوجد عجبااا

رأى ذلك الرجل محاط بثلاثة ممرضات ومقيد بواسطتهن فسالهن لماذا تفعلون به هكذا ؟؟

قالت الممرضة لانه رجل مريض بفصام الشخصية ( مختل عقليا ) ودائما يهرب من المستشفى ويأتى الى هنا وينتحل شخصية جيمس لون اغنى رجل فى العالم

الشيك كان مزور ومكنش هينفع ادم فى اى حاجة بل ربما كان تسبب فى حبسه لو قدمه للبنك لتزوير امضاء جيمس لون

اللى نفع ادم ارادته وعزيمته وليس الشيك مع انه لم يكن يعلم انه مزور

الخلاصة

قواك الروحية والداخلية اكبر بكثير من القوى المادية فقط ان استثمرتها وعرفت قدرها

بداخل الانسان طاقات مكنونة لا يعلمها الا الله

حاول ان تستعيد وان تستثير طاقاتك الداخلية

لا تستسلم للواقع فانما النصر صبر ساعة