جلست مع اخوانى فى مسجد الكلية وبدات بنزع ورقة من كشكول المحاضرات وكتبت فيها
Life is not a rehearsal
قال احدهم : ايه ده المدارسة النهاردة انجليزى ولا ايه
الاخر : ok im ready
مع ابتسامات من الاخرين
قلت للجميع هل يستطيع احدكم ان يقول ماذا تعنى هذه الجملة
قال الاول : الحياة ليست rehearsal
قال الاخر : الحياة ليست تجربة
بادرتهم الحياة ليست بروفه حقا لكن ماذا تعني هذه الجملة ؟؟
سكت الجميع
قلت يا احمد كم مره نويت على مذاكرة برانش معين وعندما جلست غيرت رايك ولم تذاكر؟؟
قال كتييييييييييييييييير
قلت يا محمد كم مره نويت على القاء كلمه فى الراوند ولما ذهبت الى الراوند غيرت رايك ومقلتش ؟؟
قال كثيييييييييييييييير
قلت كم مره دربت ومرنت نفسك على فعل عمل معين ولما جه وقت الفعل ترددت وتراجعت؟؟
قال كتيييييييييييييييير
اذن النية وحدها لا تكفي لا بد من وضع نيتك فى الفعل حقا
والحياة اللى بنعشها ليست بروفه بمعنى ان انت مش بتعيش الا الوقت ده ولا تملك الا الوقت الحالي فاستغله احسن استغلال
قاطعني محمود وقال والله منا فاهم حاجة
هافهمك يا حودة مثلا المطرب عشان يغنى اغنيه بيقعد يعمل بروفات كتيره فى كل بروفه ممكن ميكنش واقف باللبس اللى هيظهر بيه فى الحفلة
وممكن ميكنش واخد البروفه جد زى ما هيكون فى الحفلة
وممكن ينسى جملة او يعمل اللى هو عايزة فى البروفة صح كده ؟؟
محمود اه تمام
انما فى الحفة ؟؟ بيكون جاهز من كل حاجه
لكن انت فى يومك لازم تكون جاهز وتقتحم العمل وتنتهز انصاف الفرص اوعى تخلى يومك بروفه ليوم تانى اوعى تخلى الساعه اللى انت فيها بروفه للساعة القادمة
حياتك مش المستقبل حياتك مش بكرة حياتك مش المره الجاية حياتك هيا دى الان اللى بتعشها هذه اللحظة فقط
(يارب تكون المعلومة وصلت )
رد عليا خالد وقال لى بس فى عقبات كتيرة مش ممكن نتاجاهلها
قلت له الخوف من الفشل ؟؟ طيب هتتعلم امتى لو مجربتش ...انت نسيت ان مفيش حاجه اسمها فشل فى حاجه اسمها نتائج الفعل
او خايف من مواجهه الجمهور او الناس هتضحك عليا ؟ انت اصلا اتفوقت عليهم لما ظهرت قدامهم ... صدقنى انت احسن واحد فيهم
احكيلك على مثال شخصى؟؟
انا جيت مره راوند الجراحه متاخر ولقيت اصحابى واقفين بره وقالولى الدكتور مش بيدخل حد بعده مهما كان
قلت كويس لازم ننال شرف المحاولة .. خبطت على الباب وقلت له لو سمحت يا دكتور المواصلات صعبة جدا وفى ناس بره اكتر من اللى جوة فى الراوند
الدكتور بكل بساطه قال اخر مره يا دكاتره اتفضلوا
للاسف كل اللى كانوا بره الراوند مكنوش عايزين يقتحموا الفرصة اكيد كلهم فكروا يكلموا الدكتور بس ترددوا وسابوها لوقت تاني
احكيلك موقف بالسلب ؟؟
كنت راكب الاتوبيس الصبح من بلدى لطنطا وفى المحلة لقيت زميل ليا مستنى المواصلات فكرت اقول للسواق اجيب زميلى معايا بس اترددت وعشان اترددت كان السواق سبق كتير عنه فالفكرة اذادت صعوبة انى اكلم السواق وعشان كده مقلتلوش
لما رحت الكلية لقيت زميلى اتاخر جدا عما وصل وفاته كتير بسبب المواصلات مع انى كنت ممكن اوفرله وقته بس للاسف انا غلط ساعتها وقلت مش مشكله المره الجاية
بلاش ياعم مواقفي واسمع القصة دى
احمد دكتور مجتهد جدا و حلم حياته انه يسافر امريكا ويكون مشهور جدا .. بقاله 10 سنين بيذاكر بجد وبيتدرب وبياخد دورات ومن كتر ماهو كفء زميله اشرف قال له انت مستنى ايه انت افضل مني انا بنصحك تقدم فى الاختبارات انت مستواك رائع
بس احمد كان فيه ذره خوف من الرسوب فقال لا انا هتدرب اكتر واكتر عشان ابقى متاكد
اشرف رد عليه وقال له يااحمد الحياه مش تجارب وتمارين فقط لازم تخوض التجربة قبل ما سنك يكبر وتقضى عمرك كله بروفات
احمد مازال برده مستمر فى تمارينه وبروفاته
بعد سنه كان اشرف سبقه واتصل بيه من امريكا وقال له مش قلت لك life is not a rehearsal
الخلاصة
حياتك كلها تتلخص فى الموقف اللى انت بتعيشه الان .. ارجوك استغلة افصل استغلال وانتهز انصاف الفرص
بكرة او المره الجاية او وقت تانى او فى المستقبل كلها كلمات مش ملكك خرجها من قاموسك وحط بدالهم ( افعلها الان )
كل يوم جديد ربنا بيمنحه لك بيكون فرصه جديده عشان تحسن مستواك ارجوك مترفضش الهدية وتقول بكره تفرج ( عيش فى حدود يومك وخليه افضل يوم )
ارجوك ارجوك افتكر دايما الحياه مش بروفه لان مافيش غير حياة واحده اللى انت فعلا بتعشها الان
لو مش قادر تفتكرها بالعربي يبقى افتكر life is not a rehearsal
